ភ្នំពេញ៖ លោក ហ៊ុន ម៉ាណែត ត្រូវបានព្រះមហាក្សត្រចេញព្រះរាជក្រឹត្យចាត់តាំងជានាយករដ្ឋមន្ត្រីកម្ពុជា សម្រាប់នីតិកាលទី៧នៃរដ្ឋសភា។ នេះបើតាមព្រះរាជក្រឹត្យដែលព្រះមហាក្សត្រទ្រង់ឡាយព្រះហស្ថលេខានៅថ្ងៃទី០៧ ខែសីហា ឆ្នាំ២០២៣ ដែលត្រូវបាននាយករដ្ឋមន្ត្រីចាំផ្ទះសម្តេចតេជោ ហ៊ុន សែន ប្រកាសនៅក្នុងតេឡេក្រាមនាព្រឹកថ្ងៃទី០៧ ខែសីហា ឆ្នាំ២០២៣។

ក្នុងព្រះរាជក្រឹត្យ ត្រង់មាត្រា២ បញ្ជាក់ថា នាយករដ្ឋមន្ត្រីកម្ពុជា ដែលទទួលបានការចាត់តាំងខាងលើ មានភារកិច្ចរៀបចំសមាសភាពរាជរដ្ឋាភិបាលកម្ពុជា ដើម្បីសុំសេចក្តីអនុម័តទុកចិត្តពីរដ្ឋសភា។ 

គូសបញ្ជាក់ថា នៅថ្ងៃទី២២ ខែសីហា សម្តេចតេជោនឹងលែងពីតំណែងនាយរកដ្ឋមន្ត្រី ឯលោក ហ៊ុន ម៉ាណែត នឹងកាន់តំណែងបន្តពីសម្តេចតេជោ។ តែយ៉ាងណាសម្តេចតេជោនឹងបន្តឈរឈ្មោះជាប្រធានព្រឹទ្ធសភានៅអាណត្តិក្រោយឆ្នាំ២០២៤ ខាងមុខនេះ។ ជាមួយគ្នានេះសម្តេចតេជោនឹងត្រូវបានព្រះមហាក្សត្រតែងតាំងជាប្រធានឧត្តមក្រុមប្រឹក្សាព្រះមហាក្សត្រ៕